आंबा अभिवृद्धी

आंबा

आंब्याच्या अभिवृद्धीसाठी ‘कोय कलम’ ही साधी व सोपी पद्धत आहे. यापासून मोठ्या प्रमाणावर दर्जेदार कलमे तयार करता येतात. या पद्धतीने कलमे करण्यासाठी जून-जुलै हा कालावधी योग्य असतो. या पद्धतीत गादी वाफ्यावर कोयी रुजवून १५ ते २० दिवसांचे रोप मुळासकट कोयीसह काढून घ्यावे. रोपाचा खालचा ७ ते ९ सें.मी. भाग ठेवून शेंडा छाटावा. कापलेल्या टोकामधून सुमारे ४ ते ६ सें.मी. लांबीचा बरोबर मध्ये काप घ्यावा. ज्या जातीची कलमे करावयाची असतील, त्याची ३ ते ४ महिने वयाची, जून, निरोगी आणि डोळे फुगीर, परंतु न फुटलेली १० ते १५ सें.मी. लांबीची काडी कापून घ्यावी. त्या काडीवरील सर्व पाने कापून टाकावीत आणि काडीच्या खालच्या बाजूस ४ ते ६ सें.मी. लांबीचे दोन तिरकस काप विरुद्ध बाजूला देऊन पाचरीसारखा आकार द्यावा. त्यानंतर ही काडी रोपावर दिलेल्या कापात व्यवस्थित बसवावी. कलमाचा जोड २ सें.मी. रुंद आणि २० सें.मी. लांबीच्या पॉलिथिनच्या पट्टीने घट्ट बांधून घ्यावा. नंतर ही कलमे १४ x २० सें.मी. आकाराच्या पॉलिथिनच्या पिशवीत लावावीत. लावताना कलमांचा जोड मातीच्या वर राहील, याची काळजी घ्यावी. कलम बांधल्यापासून १५ ते २० दिवसांत काडीला नवीन फूट येते.